Imivugo migufi ya Ananias Kabirigi

Ni ibya Ananias Kabirigi w’imparamba

Isuka

Isuka y’igikara, y’igikaka

Igira igikundiro mu gikari

Ntitetereza abahinzi

Itera ubwuzu mw’ikungira

Inkundirwagutabira,

Iya Rutabangamira abahinzi

Isuka yatsinze Rumanura

Igatsinda Ruzagayura

Igatsinda Gakwege na Kazuba

Itsinda Iragara na Muryamo

Ihinga amasaka n’ibishyimbo

Ihinga amashaza n’ibirayi

Ihinga imyumbati, ibitoke n’ibijumba

Itera ikawa ngengabukungu mu Rwanda

Ari yo igera mu mahanga, ikazana amadevise

Isibura imiringoti, tugatera setariya na tribsakumu

Gereveriya n’urubingo, pinus na jakaranda, avoka

Na cederela n’ibindi biti bitubyarira amakara n’imbaho

Igishyimbo

Inyama yatangiye kwirata iti:

Ndi inyamibwa y’inyama zombi ya Rukungirinogo

Rwahama sindatirwa inganga, nitwa ingorabashyi

Igishyimbo kiraza kiti: ceceka Mbonekarimwe!

Ureke ahubwo nkubwire ibyanjye bigwi:

Ndi Ruhihiza rwa Kirayi

N’iyo ntarera mba mhakinze ingabo y’ikibabi

Ndi Rutuku rutonorerwa ku rutaro

Rugatekwa mu ntango

Rukavomerwa na Nyirintege

Rukagandura intebyi

Mbaraga ya Mbaruyimbavu

Nagarukanye umugore

Ku gihuru, igihunyira kiti: hiiiin!

Ubwo amarembo ati: urabeshya

Umupfu ni uwa Rugaju rwa Mhutiramazi umuntu araguye

Ko nagomeje umugezi umugabo kuri Kigeli wa mbere

Muvunira igihunda mucira igihuzu

Ikivuno ari ikivuguto

Kiti nitwa Vovo nitwa Vongonyora

Amasaka

Amasaka araza ati:

Ndi Bitanyu biteze intenderi

Rugori rwa Binyonga

Ruvuzo rw’amapfupfu

Ntawe umvirira ndi mu ntango