Umushari w'urushako

                                            par Océane Nyirazuba

Mupenzi ati  « umushako si umushongi ».

 Bakunzi , Bakundwa  , mumpe urubuga

Mvuge urushako ntashira amanga,

 Mumbe hafi amangambure abure inganzo.

Mu ngamba z’abasizi banga impuha !

Sinshyenga  sinshyoma ndaganira !! !

Simbashuka , narashishoje ! ;

Uwo mushandiko si kanyoti !!!!!

Ni cyamunara idasiga ubuntu !

Ni cyamunara inaniza  ubwonko ,

Aho i shakiramuruho itabaza ubwoko 

Abandi baba bapanga imibereho myiza

Yuzuye umunezero  uwatoye inomero

Idakwiye ahora   mucyunamo cy’urwibutso

Yibaza impamvu imishinga ibaye imishari

 Yibaza impamvu ya nkangaza ituma ubuzizi

Yibaza aho avanye uwo mwaku yari umwana

Wera ibisage , yari umwali uberewe n’ amasunzu

 akaberwa n’inkindi, yakenyera inkanda

igahinduka  igahinduka umwite

Akumva umushari w’urushako !

 ubwenge  bukuzura ibikomere n’ibikomesha !

Agahinduka  indushyi  umutima utuwe n’indishyi

Iyo mbimenya igakomanga, iyo mumvira igakinguka !

Icyansubiza ubutoya ikaba interuro n’intashyo

Naragowe ikikiriza nararushye ikikiriza ,

Aho umutima utuwe n’ akangari k’agahinda !

Umushali w’urushako  ukaguteza  abashinyaguzi.

Ukabura ubujyambere n’ubuziranenge !

Ny’iyo kanyoti nabatanze !

Mana umbe hafi ntarenga imbago zawe !

Mbare urushako ntashira amanga

 rushika benshi  bagashidukira kurushinga

ngo bahuze imitima n’imitungo !

Basinde umunezero bahashye umunabi

 bagwize incuti   n’incuke  bagwize ingabire

 bashimwe imigambi , bahabwe imigisha

Basinde urukundo  ubukwe buhinde

Inzoga zinyobwe inzigo zicike !

Bagubwe neza  ingoma  ibihumbi  bange icyuho,

Bacure, bacurere bace agahigo agahinda guhunge.

Bate   agatu batuze baterane inkunga !

Mushire amatsiko, ariko ntimunyakire ntarikiriza

Mushire amatsiko, mureke kwitsa impuha

Impuha si mpundu impanda yazo irakabura amayira

Ndabasogongeza  uwo mushali udashima  acire

Akaboze n’akabishye  bitaramugwa nabi cyangwa se

 ejo bitazacika ngo  umugwaneza yarabacenze !,

Urushiko rw’urushako  ruhinduka umushari ;

Sinimara  ipfunwe  ngo nkunde nkundwe.

Sinzi niba narasabitse umuteke utanovera,

Ngahisha inkara aho kuba inkangaza !

Sinzi niba naranze kuba vumiriya mateso

Nikozubaka ,Bajyagahe na kalimunda 

Ngo nsembure ubuzima buse n’isimbi .

Nashatse impamvu  mpishura imvano

Yemwe, yemwe  abanjye n’abahandi,

Muntege amatwi  mbasogongeze ku mushali

Simbaha intango y’inturire ngo musomeze 

 Iyo y’imbehe Y’imbihire !

 si amatakirangoyi narayikuje  

Mutege amatwi mbabwire,

 mvuge iryo pfundo  karande rikurwa na tiribunali

na signature  nyamara ryarapfunditswe na nyirubwite.

Agashyiraho umwete ngo aripfundure

Rikanga rikaba insobe  y’amapfundo.

 maze  imvuzi n’inzimuzi zikabona inkuru itagira imvano,

Aho ripfunditse haba amateka  yanditse  ku mitima

Y’abayihuje ayo mateka atera amatsiko

Abitsa impuha bakayarusha banyirayo

Dore ko impanda y’impuha irusha nyiramubande

Kwirangira no gusakara mu bisagara nta muzindaro

Nasabitse amahoro  mvunura amahiri !

Narapfunye uwanjye  urapfupfunuka,

Tsunami yawo irenga ubwonko itera umutima.

Itemba  mu nzu no mu muhanda.

Amateka ahinduka umushari !

Indero nahawe imara ubwoba imbera  insinzi

nsigara nemye nima umwanya abanyampuha,

Nanga amazimwe nzimya iyo nkongi !

Abatwenga n’abanyanga  babona interuro

 Intango  y’impuha ibona abasomyi 

barasinda  barasamira  barasakuza  barusha isandi .

Bezi  na leffu bibatiza  umurindi barahuhera,

Nti amaherezo yanyu ni ukugobwa  murakamobwa !

Muravuga mukibagirwa ko nimusinzira mufunga utuyozo !

Inkuru ntiyatinze haje izindi à la une,

Nsanga  itorero ry’intore zishaje zitagica mu nka ngo

Zirangamirwe n’abazireba bizihihiwe n’umuhamilizo!

Nti sinababwiye ko ntari uwambere n’uwanyuma !

Njye ,nguma mu bana ubwo mba umubyeyi !

Nkomeza  ingobyi imugongo njisha uwo hepfo n’uwa ruguru !

Uwali maraya aba madamu !

Abanyamazimwe barazubara,abanga impuha bahirahira

Bakurura bezi ngo basiguze babura rezo barazubara !

Bakurura webe babura  pagi barasuhererwa.

Nti « ese aho mama za ndimi zatyaliye  kumpa idende  

 kuri bezi, ziragobwe, ziracitse  cyangwa  se ziragonzwe ?

 nti « ntimuzambuza kugoheka murakamobwa ! »

Menya ko imvano ari   mitsingi  n’umusaraba yimanuriye

Nako si umusaraba ni umusozo  w’inzozi  zibishye.

Yabaye ituro riteye imbabazi imbere y’Imana  

Izajya  igorora  yaremye agatima  Segahinda

imuhunda ubuntu  n’ubugwaneza ahinduka sayisayi !

Asa n’ihundo ry’imbuto  isukiruwe  n’akavura ka gicuransi !

Ariko ingeso iranga iratumburuka iza  isa n’umurengwe

Wa cya kinonko cyo kumpeshyi

Umusaraba uteza abakwennyi

 utera intimba  mu mutima w’intashya

 Intashyo yawo ni  umushali rwa rushiko rw’urushako !

Umwali aranga aba nyiramirimo ,nyampinga tumuha impundu !

Ishyari  n’ikimwaro byica nabi  sematiku afatwa na alizayimeli

Azana ubugambo n’ubugambanyi  utwita inzigo y’urudaca.

Kubw’amahirwe ubona muganga ariwenyira magorwa wagabiwe

umukubabibero n’umwaku mu mibereho ye yose.

Arawikorera aratuza. Ati ucanye uruti uratashye ?

Simvuga aya Ndongo  ndavuga imyato ndata  inkindi

Ifubitse   Ifumba  igasusurutsa  imitima ibunga .

Ndavuga agasaro k’iwacu, keza inka n’abana

Ni mutima ukeye uzira ikizinga . Ndamushima yo gaheka !

Nazamutse impinga  minuka imanga mbima amatwi

Umwami wanjye amfatira ifumba mbona inyenyeli

Imwe navutse yaka ikazimira ku ruyenzi ,

Ndahumeka ! nshimira imana itarampanye 

Nti  amatakira ngohi muyamagire ritararenga !

Ngaruye ubuyanja !

Nitwa copine ndetse cobusi  naya ntwari irera abana.

Ni ko imitaga iba itaka ryayo, sinamenye  ibango ry’ ibanga

Ngo ntanga kavumu namutandi aho  abasinga bagize indaro,

Aho indatwa zivuka ingoma zivuga inka zivumera !

Nanze kuba umunyaga  mu muyaga w’impuha  

mpumurira Imana imandwa z ‘iwacu zirahaguma !

ubwo  mpabwa akato n’abahuhera

Ubwo abashishoza bampa ihumure

Ndacurera ! sincururutse n’incike :

Nateye umugongo  izo ngalisi, nkomeza  inkanda

Nkunda abanjye  umuzi w’ubuzima ushibuka bwangu

Umuzi w’inzika uguma amagepfo !

Neza imana imandwa z’iwacu

Zimpa agacu mpindiramo ntuje .

uwo mpaye umwitangirizwa ndamutanga

Amahwa y’urushako ahwera nyareba nyita ishyano

Cyanunara mba ndayicitse !

Mvuma ibyahise ngo ntazasubira

Indahiro yanjye iba amahoro

Uwanyambure Mbarara azomongana

Ubwa gahini , amahiri y’uwiteka ateye ubwoba !

 Ng’uwo umushali w’urushako !!