Dukomeze "Icyivugo cy'imfizi" cya Gasimba Farasisiko n°7

Ikiruhuko cyabaye kirekire, ariko ndatekereza ko nta gihe cyatakaye kuko tugiye kongera gusaranganya ubuhanga bwa Gasimba Farasisiko. Ubushize twasize Ikimiramirane Bangaheza mu busitani abatumiwe bakigeze kure. Karenzi niwe twasubikiyeho. None rero hatahiwe Cyubahiro yitotomba ati "Mpogora iminopfu Nyandwi ayinovora"., ngo kubera ko ari umwana. Ariko ubwo Nsanzimana nawe amuri hafi atangiye kwikangata ngo "amajwi akoronga inyangarwanda kuki ahishira ba Rusahuzi" yongera yibaza ati "Kwiba ni ugukunda u Rwanda?" Ubwo nawe biba biramunize! Asigara arwana n'ishingo dore ko yari yiyemeje kurikacanga kacanga!

Simenyereye gufata ijambo Ariko ndagerageza uko mbishoboye Ninashyoma mumbabarire Ntabwo bimbuza gucurura Umunyamabanga wavuze atangiza Uyu muhango wo kurya neza Nitwa Cyubahiro abatanzi Kera niga iyo mu mahanga Badutumiye muri famille - Mumbabarire nari ncitswe Nshinzwe kwita ku Kinyarwanda - Baradutumiye turakiriwe Turarya turanywa turavuyarara Bamaze kwanura amasahane Nti inyama iryoshye mwaduhaye Iva ku itungo bwoko ki? Bati uyu musore aturuka hehe Utazi umwami w'inyama zose? Barashushanya nditegereza Barasobanura maze kumva Nsanga ari inkeri iba mu Rwanda Cyane mu misozi y'imisumba Nk'iya Gikongoro n'iya Kibuye Hamwe umukanda wagize imbata Ariko se ukuntu ifite uburyohe Mwa bagore mwe mwa bagabo mwe! Agatako kayo karumutseee! Mbese karuta aka rusake Rudakemangwa ku isahane! Cyangwa ak'ifi iryoha cyane Ifite igarade ya Kapiteni - Nishe kandi ururimi rwacu Mumbabarire ntacyo byishe - Ngaho rero nimumbwire Na Kaminuza yanjye ahubwo Nubwo abayo bishe umwaka Ifite uruhande rw'abanyabwenge Biga ibyerekeye imirire. bize neza bashishoza Inyama ziribwa n'izitaribwa Imboga ziribwa n'izitaribwa Amazi anyobwa yo turayazi Ariko ubwo wenda n'ibitaribwa Byatuviramo umuti mwiza Ntabwo muzi Rwiziringa Ukuntu ivura indwara nyinshi Kandi ngo bayicamo n'amarozi? Mbe bahanga mwahagurutse Mukatuvura aka kandare. Jyewe umwungeri w'abahanzi N'ubwo muzika tutajya imbizi Ntabwo byambujije guhimba Aka karirimbo namwe mwumve Kagenewe abashakashatsi Ngo kabakangure bahumuke Bashakashatsi mushire ishozi Mufite ubwenge n'ubushishozi U Rwanda rwacu murarureba Rufite ingorane mu bukungu Dore amasambu yaradushiranye Inzara ituzahaza turirimba Ngo mu biribwa tuzihaza Izuba ryava tugasabiriza Twimereye nka kirondwe Gishakishiriza ku mwite None rero bana banjye Yego abandi murambyaye Cyane mwe ntiti mu mirire Ni mucukumbure mutubwire Amayere yandi yo kwitunga Ahita akebuka abo bicaranye Ngaho rero nimunyereke

Nshuti bagenzi banjye mwese Ahatavugitse tuhavugurure Ako karirimbo tukitoze Tukumvishe Fondateri Abure aho ahera adutiruza Iriya ntizanyo y'imbehe Abazifuza nabo ni benshi Kandi ntacyo turusha abandi Ari amashuri ari ubushishozi Uretse ko twigiriye amahirwe Tugasakirana n'iringaniza Rikaturinda kugwa mu cyobo Wa mubyeyi twamuneza Na we agakomeza kutwizera. Umusore Cyubahiro araceceka Ananiwe ashatse kumira akuka Ngo afate akaboga abone gukomeza Arebye inkoko iteretse imbere ye Iteye nk'intaro zo mu Buganza Asanga yeze nk'ejobundi Niko gukabuka avugana imbaraga Dore ni Nyandwi wandagaje Mpogora iminopfu ayinovora N'abo mbwira batanyumva Ngo ndi umwana ntacyo mbarusha! Ariko ndaka izindi. Makulata we, ye Makulata Uriya mugufi se siko yitwa? - Ni iki Disi ko witota? - Garuka hino mfate ikotoleti Ndabona izindi bazinumye Habe n'akanopfu ko gutonora Ikimiramirane Bangaheza *** Nsanzimana ashaka kuvuga: Maze iminsi ntaba mu Rwanda Mwumve ikibazo mvanye hanze: Amajwi akoronga inyangarwanda Kuki ahishira Rusahuzi Kwiba ni ugukunda u Rwanda? Mureke manze mire mbabwire Nafashe ishingo mfite umugambi Wo kurikacanga karikacanga None ndabona runo rubanza Rwananiranye nk'urw'inkotanyi N'abakekwaho kuba ibyitso Kandi imanza arijye uzigenga. Icyo mbona twavuga ku mirire Y'iri tungo ryo ku ishingo Nako iri shingo ry'iri tungo Buretse mbanze mire ariko... -Banza  urangize inyama yawe Wagize ingorane zidasanzwe Amatama yuzuye inyama nyinshi Ngo burya yuzura n'amazinda Jye urwo rubanza narubonye Ntabwo ari urucamicuko Ni urucabashi bo mu Kinyaga Nka Nteziryayo na Ntagerura Bafite amenyo yabimenyereye Mbaye nkawe nabaharira, Ari Munyazesa umucyocyora. Nsanzimana asaba imbabazi Ati uru rushingo rwankomereye Rwamfatanyije n'intege nkeya Kandi ntabwo narurekura Ndumva rwuzuyemo rukuruzi Ndavuga mbanje kumira akuka Mbaye mpaye abandi umwanya Mbe ninginga Bangaheza

Tuzakomeza ubutaha